ਸੀਮੇਂਟ ਦੇ ਖਾਲੀ ਬਲਕਰ ਨੂੰ ਅੱਗ ਨੇ ਆਪਣੀ ਲਪੇਟ ਵਿਚ ਲਿਆ, ਟਰਾਲਾ ਸੜ ਕੇ ਸੁਆਹ

ਸੀਮੇਂਟ ਦੇ ਖਾਲੀ ਬਲਕਰ ਨੂੰ ਅੱਗ ਨੇ ਆਪਣੀ ਲਪੇਟ ਵਿਚ ਲਿਆ, ਟਰਾਲਾ ਸੜ ਕੇ ਸੁਆਹ
7ਡੇਅ ਨਿਊਜ ਸਰਵਿਸ
ਬਰਨਾਲਾ :- ਬਰਨਾਲਾ ਬਠਿੰਡਾ ਮੁੱਖ ਮਾਰਗ ’ਤੇ ਸਥਿਤ ਤਪਾ ਲਾਗੇ ਇਕ ਟਰਾਲੇ ਨੂੰ ਅਚਾਨਕ ਤਿੱਖੜ ਦੁਪਿਹਰੇ ਭਿਆਨਕ ਅੱਗ ਨੇ ਆਪਣੀ ਲਪੇਟ ਵਿਚ ਲੈ ਲਿਆ। ਜਿਸ ਕਾਰਨ ਟਰਾਲਾ ਕੁਝ ਹੀ ਸਮੇਂ ਵਿਚ ਸੜ ਕੇ ਸੁਆਹ ਹੋ ਗਿਆ। ਮੌਕੇ ’ਤੇ ਜਾ ਕੇ ਪ੍ਰਾਪਤ ਕੀਤੀ ਜਾਣਕਾਰੀ ਅਨੁਸਾਰ ਗੁਰਦਿੱਤ ਸਿੰਘ ਉਰਫ ਟੋਨੀ ਨਾਮਕ ਡਰਾਇਵਰ ਸੀਮੇਂਟ ਦਾ ਬਲਕਰ ਪਟਿਆਲਾ ਤੋ ਖਾਲੀ ਕਰਕੇ ਵਾਪਸ ਬਠਿੰਡਾ ਵੱਲ ਨੂੰ ਪਰਤ ਰਿਹਾ ਸੀ, ਜਿਉ ਹੀ ਟਰਾਲਾ ਤਪਾ ਬੱਸ ਅੱਡੇ ਤੋ ਚੰਦ ਦੂਰੀ ’ਤੇ ਆਇਆ ਤਦ ਅਚਾਨਕ ਹੀ ਟਰਾਲੇ ਦੇ ਕੈਬਿਨ ਵਿਚ ਧਮਾਕਾ ਹੋਇਆ, ਬੇਸ਼ੱਕ ਟਰਾਲਾ ਡਰਾਇਵਰ ਨੇ ਸੂਝਬੂਝ ਤੋ ਕੰਮ ਲੈਦਿਆਂ ਟਰਾਲੇ ਵਿਚੋ ਛਾਲ ਮਾਰ ਕੇ ਆਪਣੀ ਜਾਨ ਬਚਾਈ ਪਰ ਟਰਾਲੇ ਵਿਚ ਅੱਗ ਦੇ ਤੇਜ ਹੋਣ ਕਾਰਨ ਡਰਾਇਵਰ ਗੁਰਦਿੱਤ ਸਿੰਘ ਟੋਨੀ ਜਖਮੀ ਹੋ ਗਿਆ। ਜਿਸ ਨੂੰ ਤੁਰੰਤ ਸਬ ਡਵੀਜਨਲ ਹਸਪਤਾਲ ਅੰਦਰ ਇਲਾਜ ਲਈ ਭਰਤੀ ਕਰਵਾਇਆ ਗਿਆ। ਉਧਰ ਟਰਾਲੇ ਨੂੰ ਅੱਗ ਨੇ ਪੂਰੀ ਤਰਾਂ ਆਪਣੀ ਲਪੇਟ ਵਿਚ ਲੈ ਲਿਆ ਸੀ। ਜਿਸ ਕਾਰਨ ਕੁਝ ਹੀ ਸਮੇਂ ਵਿਚ ਟਰਾਲੇ ਦਾ ਕੈਬਿਨ, ਟਾਇਰ ਆਦਿ ਸੜ ਕੇ ਸੁਆਹ ਹੋ ਗਏ। ਘਟਨਾ ਦਾ ਪਤਾ ਲੱਗਦਿਆਂ ਹੀ ਲੋਕਾਂ ਦਾ ਇੱਕਠ ਵੀ ਜ੍ਰਮਾਂ ਹੋਣਾ ਸ਼ੁਰੂ ਹੋ ਗਿਆ, ਪਰ ਹਿੰਮਤੀ ਲੋਕਾਂ ਨੇ ਟੂਟੀ ਵਾਲੀ ਪਾਇਪ ਨਾਲ ਵੀ ਅੱਗ ਬੁਝਾਉਣ ਦੇ ਯਤਨ ਜਾਰੀ ਰੱਖੇ, ਕੁਝ ਸਮੇਂ ਬਾਅਦ ਫਾਇਰ ਬਿ੍ਰਗੇਡ ਗੱਡੀ ਆਈ। ਜਿਸ ਨੇ ਤੇਜ ਅੱਗ ’ਤੇ ਕਾਬੂ ਪਾਇਆ। ਉਧਰ ਖਬਰ ਲਿਖੇ ਜਾਣ ਤੱਕ ਡਰਾਇਵਰ ਇਲਾਜ ਅਧੀਨ ਸੀ, ਭਾਵੇਂ ਟਰਾਲੇ ਨੂੰ ਅੱਗ ਦੀ ਲਪੇਟ ਵਿਚ ਆਉਣ ਕਾਰਨ ਕੋਈ ਜਾਨ ਨੁਕਸਾਨ ਤੋ ਤਾਂ ਬਚਾ ਰਿਹਾ ਪਰ ਲੱਖਾਂ ਰੁਪੈ ਦਾ ਮਾਲੀ ਨੁਕਸਾਨ ਹੋਇਆ ਵਿਖਾਈ ਜਰੂਰ ਦਿੱਤਾ।