ਫੈਕਟਰੀ ਵਿਚੋ 50 ਬੋਰੀਆਂ ਭੁੱਕੀ ਸਣੇ ਦੋ ਵਿਅਕਤੀ ਸੀ.ਆਈ.ਏ ਦੇ ਹੱਥ ਲੱਗੇ, ਮਾਮਲਾ ਦਰਜ

ਫੈਕਟਰੀ ਵਿਚੋ 50 ਬੋਰੀਆਂ ਭੁੱਕੀ ਸਣੇ ਦੋ ਵਿਅਕਤੀ ਸੀ.ਆਈ.ਏ ਦੇ ਹੱਥ ਲੱਗੇ, ਮਾਮਲਾ ਦਰਜ
ਲੁਭਾਸ਼ ਸਿੰਗਲਾ
ਬਰਨਾਲਾ
ਜਿਲਾ ਬਰਨਾਲਾ ਦੇ ਸੀ.ਆਈ.ਏ ਸਟਾਫ ਵੱਲੋ ਬੀਤੀ ਰਾਤ ਇਕ ਵੱਡੀ ਪ੍ਰਾਪਤੀ ਕਰਦਿਆਂ 50 ਬੋਰੀਆਂ ਭੁੱਕੀ ਸਣੇ ਪਿੰਡ ਰੂੜੇਕੇ ਕਲਾਂ ਦੇ ਦੋ ਵਿਅਕਤੀਆਂ ਨੂੰ ਦਬੋਚ ਲਿਆ ਹੈ, ਜਿਨਾਂ ਨੇ ਬਰਨਾਲਾ ਬਠਿੰਡਾ ਮੁੱਖ ਮਾਰਗ ’ਤੇ ਪਿੰਡ ਘੁੰਨਸ ਲਾਗੇ ਸਥਿਤ ਇਕ ਫੈਕਟਰੀ ਵਿਖੇ ਭੁੱਕੀ ਦੀ ਉਕਤ ਖੇਪ ਨੂੰ ਲੁਕੋ ਕੇ ਰੱਖਿਆ ਹੋਇਆ ਸੀ। ਮਾਮਲੇ ਦੇ ਪੜਤਾਲੀਆਂ ਅਧਿਕਾਰੀ ਅਤੇ ਸੀ.ਆਈ.ਏ ਸਟਾਫ ਵਿਚ ਤੈਨਾਤ ਸਬ ਇੰਸਪੈਕਟਰ ਸਰੀਫ ਖਾਂ ਨੇ ਦੱਸਿਆਂ ਕਿ ਸੀ.ਆਈ.ਏ ਸਟਾਫ ਦੇ ਇੰਚਾਰਜ ਕਮ ਇੰਸਪੈਕਟਰ ਬਲਜੀਤ ਸਿੰਘ ਕੋਲ ਮੁਖਬਰੀ ਸੀ ਕਿ ਇਲਾਕੇ ਅੰਦਰ ਭੁੱਕੀ ਦੀ ਵੱਡੀ ਖੇਪ ਪੁੱਜੀ ਹੈ। ਜਿਸ ਦੀ ਪੈੜ ਨੱਪਦਿਆਂ ਸੀ.ਆਈ.ਏ ਸਟਾਫ ਨੇ ਉਪ ਕਪਤਾਨ ਪੁਲਿਸ ਗੁਰਵਿੰਦਰ ਸਿੰਘ ਤਪਾ ਨਾਲ ਮਿਲ ਕੇ ਉਕਤ ਫੈਕਟਰੀ ਵਿਖੇ ਛਾਪੇਮਾਰੀ ਕੀਤੀ, ਜਿੱਥੇ ਸੀ.ਆਈ.ਏ ਪੁਲਿਸ ਦੇ ਹੱਥ ਭੁੱਕੀ ਦੇ 50 ਗੱਟੇ ਭਾਵ 10 ਕੁਇੰਟਲ ਭੁੱਕੀ ਬਰਾਮਦ ਹੋਈ, ਜਿਨਾਂ ਵਿਚੋ ਤਿੰਨ ਗੱਟੇ ਕੋਲ ਖੜੀ ਸਵਿੱਫਟ ਕਾਰ ਵਿਚੋ ਬਰਾਮਦ ਹੋਏ। ਪੜਤਾਲੀਆ ਅਧਿਕਾਰੀ ਸਰੀਫ ਖਾਂ ਨੇ ਅੱਗੇ ਦੱਸਿਆਂ ਕਿ ਉਕਤ ਕਾਰ ਰਾਹੀ ਨਸ਼ੇ ਦੇ ਸਮੱਗਲਰ ਮਾਲ ਦੀ ਸਪਲਾਈ ਕਰਦੇ ਸਨ। ਉਨਾਂ ਦੱਸਿਆ ਕਿ ਪੁਲਿਸ ਨੇ ਮਾਮਲੇ ਵਿਚ ਦੋ ਵਿਅਕਤੀਆਂ ਨੂੰ ਨਾਮਜਦ ਕੀਤਾ ਹੈ। ਜਿਨਾਂ ਦੀ ਪਛਾਣ ਤਰਲੋਕ ਸਿੰਘ ਪੁੱਤਰ ਪਿਆਰਾ ਸਿੰਘ ਅਤੇ ਹਰਮੀਤ ਸਿੰਘ ਪੁੱਤਰ ਸੁਰਜੀਤ ਸਿੰਘ ਵਾਸੀਅਨ ਰੂੜੇਕੇ ਕਲਾਂ ਵਜੋ ਹੋਈ ਹੈ। ਜਿਨਾਂ ਦੇ ਖਿਲਾਫ ਭਾਰਤੀ ਦੰਡਵਾਲੀ ਕਾਨੂੰਨ ਦੀ ਐਨ.ਡੀ.ਪੀ.ਐਸ ਐਕਟ ਦੀ ਧਾਰਾ ਤਹਿਤ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਮਾਮਲੇ ਦੀ ਡੂੰਘਾਈ ਨਾਲ ਪੜਤਾਲ ਕਰ ਰਹੀ ਹੈ ਕਿ ਉਕਤ ਫੈਕਟਰੀ ਨੂੰ ਨਾਮਜਦ ਵਿਅਕਤੀਆਂ ਨੇ ਕਿਸ ਅਧਾਰ ’ਤੇ ਵਰਤਦੇ ਸਨ। ਜਿਕਰਯੋਗ ਹੈ ਕਿ ਤਪਾ ਇਲਾਕੇ ਅੰਦਰ ਨਸ਼ੇ ਦੀ ਭਰਮਾਰ ਪਿਛਲੇ ਕੁਝ ਸਮੇਂ ਤੋ ਸੁਣਾਈ ਦੇ ਰਹੀ ਹੈ ਜਦਕਿ ਕਾਫੀ ਲੰਬੇਂ ਸਮੇਂ ਤੋ ਬਾਅਦ ਪੁਲਿਸ ਦੇ ਹੱਥ ਐਨੀ ਵੱਡੀ ਭੁੱਕੀ ਦੀ ਖੇਪ ਲੱਗੀ ਹੈ।