ਬਠਿੰਡਾ ਦੀ ਕੇਂਦਰੀ ਜੇਲ ’ਚ ਹੁਣ ਕੈਦੀ ਨੇ ਜੇਲ ਵਾਰਡਨ ਦੇ ਜੜ ਦਿੱਤਾ ਥੱਪੜ ਤੇ ਪਾੜ ਦਿੱਤੀ ਵਰਦੀ
7ਡੇਅ ਨਿਊਜ ਸਰਵਿਸ
ਬਠਿੰਡਾ 22 ਜਨਵਰੀ : ਗੋਬਿੰਦਪੁਰਾ ਵਾਲੀ ਕੇਂਦਰੀ ਜੇਲ ਬਠਿੰਡਾ ਵਿਚ ਇਕ ਕੈਦੀ ਵੱਲੋ ਜੇਲ ਵਾਰਡਨ ਦੀ ਕੁੱਟਮਾਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਿਸ ਵਿਚ ਕੈਦੀ ਖਿਲਾਫ ਵੱਖ ਵੱਖ ਧਾਰਾਵਾਂ ਤਹਿਤ ਮਾਮਲਾ ਦਰਜ ਹੋ ਗਿਆ ਹੈ। ਮਿਲੀ ਜਾਣਕਾਰੀ ਅਨੁਸਾਰ ਕੈਦੀ ਨੇ ਜੇਲ ਵਾਰਡਨ ਦੇ ਥੱਪੜ ਮਾਰਨ ਦੇ ਨਾਲੋ ਨਾਲ ਉਸ ਦੀ ਵਰਦੀ ਵੀ ਪਾੜ ਦਿੱਤੀ ਜਦਕਿ ਬੰਦੀ ਦੌਰਾਨ ਵਾਰਡਨ ਨੇ ਇਕ ਕੈਦੀ ਨੂੰ ਬੈਰਕ ਵਿਚ ਜਾਣ ਲਈ ਕਿਹਾ ਸੀ ਪਰ ਉਸ ਨੇ ਇਨਕਾਰ ਕਰ ਦਿੱਤਾ। ਪੁਲਿਸ ਨੂੰ ਆਪਣੇ ਬਿਆਨਾਂ ਵਿਚ ਕੇਂਦਰੀ ਜੇਲ ਦੇ ਸਹਾਇਕ ਸੁਪਰਡੈਂਟ ਨੇ ਦੱਸਿਆ ਹੈ ਕਿ 21 ਜਨਵਰੀ ਨੂੰ ਜੇਲ ਦਾ ਹੈੱਡ ਬੰਦੀ ਖ਼ਤਮ ਹੋਣ ਤੋਂ ਬਾਅਦ ਕੈਦੀਆਂ ਤੇ ਹਵਾਲਾਤੀਆਂ ਨੂੰ ਬੈਰਕਾਂ ਵਿਚ ਜਾਣ ਲਈ ਕਹਿ ਰਿਹਾ ਸੀ। ਇਸ ਦੌਰਾਨ ਜਦੋਂ ਉਸ ਨੇ ਭਵਾਨੀਗੜ ਵਾਸੀ ਕੈਦੀ ਨੂੰ ਬੈਰਕ ਵਿਚ ਜਾਣ ਲਈ ਕਿਹਾ ਤਾਂ ਉਸ ਨੇ ਇਨਕਾਰ ਕਰ ਦਿੱਤਾ ਅੱਗਿਓ ਵਾਰਡਨ ਨਾਲ ਬਹਿਸ ਕਰਨ ਲੱਗ ਪਿਆ। ਜੇਲ ਅਧਿਕਾਰੀ ਅਨੁਸਾਰ ਜਦੋਂ ਹੈੱਡ ਵਾਰਡਨ ਨੇ ਉਸ ਨੂੰ ਬੈਰਕ ਵਿਚ ਭੇਜਣ ਦੀ ਕੋਸ਼ਿਸ਼ ਕੀਤੀ ਤਾਂ ਮੁਲਜ਼ਮ ਕੈਦੀ ਨੇ ਜੇਲ ਵਾਰਡਨ ਨੂੰ ਥੱਪੜ ਮਾਰ ਦਿੱਤਾ ਤੇ ਉਸ ਦੀ ਵਰਦੀ ਪਾੜ ਦਿੱਤੀ। ਇਸ ਤੋਂ ਬਾਅਦ ਜੇਲ ਦੇ ਹੋਰ ਸੁਰੱਖਿਆ ਕਰਮਚਾਰੀਆਂ ਨੇ ਦੋਸ਼ੀ ਕੈਦੀ ਨੂੰ ਫੜ ਕੇ ਬੈਰਕ ’ਚ ਬੰਦ ਕਰ ਦਿੱਤਾ। ਸਹਾਇਕ ਥਾਣੇਦਾਰ ਬਲਜੀਤ ਸਿੰਘ ਅਨੁਸਾਰ ਜੇਲ ਪ੍ਰਸ਼ਾਸਨ ਵੱਲੋਂ ਮਿਲੇ ਪੱਤਰ ਦੇ ਆਧਾਰ ਉਪਰ ਕੈਦੀ ’ਤੇ ਕੇਸ ਦਰਜ ਕੀਤਾ ਗਿਆ ਹੈ।
22-4ਏ