ਅਜੌਕੇ ਸਮੇਂ ’ਚ ਖੂਨਦਾਨ ਸਭ ਤੋ ਉੱਤਮ ਦਾਨ
ਲਾਲਾ ਜਗਤ ਨਰਾਇਣ ਜੀ ਦੀ ਯਾਦ ‘ਚ ਖੂਨਦਾਨ ਕੈਂਪ 27 ਨੂੰ ਅੱਗਰਵਾਲ ਧਰਮਸ਼ਾਲਾ ਵਿਖੇ
7ਡੇਅ ਨਿਊਜ ਸਰਵਿਸ,
ਤਪਾ ਮੰਡੀ (ਬਰਨਾਲਾ) 15 ਅਗਸਤ : - ਇਨਸਾਨੀਅਤ ਨਾਤੇ ਕਿਸੇ ਦੀ ਜਿੰਦਗੀ ਖੂਨ ਦਾਨ ਕਰਕੇ ਬਚਾਉਣੀ, ਇਕ ਸਮਾਜਿਕ ਪੁੰਨ ਦੇ ਨਾਲੋ ਨਾਲ ਖੁਦ ਨੂੰ ਸਕੂਨ ਦੇਣ ਵਾਲਾ ਸਭ ਤੋ ਵੱਡਾ ਇਨਸਾਨੀ ਕਾਰਜ ਹੈ। ਇਕ ਤੰਦਰੁਸਤ ਮਨੁੱਖ ਤਿੰਨ ਮਹੀਨੇ ਬਾਅਦ ਖੂਨ ਦਾਨ ਕਰਕੇ ਦਾਨ ਦੇ ਚਲ ਰਹੇ ਯੱਗ ਵਿਚ ਹਿੱਸਾ ਪਾ ਸਕਦਾ ਹੈ। ਇਹ ਵਿਚਾਰ
ਜੀ.ਮਾਲ ਦੇ ਐਮ.ਡੀ ਅਤੇ ਸਮਾਜ ਸੇਵੀ ਸੰਜੂ ਗੁਪਤਾ ਨੇ ਸ਼ਹਿਰ ਅੰਦਰ ਲਾਲਾ ਜਗਤ ਨਰਾਇਣ ਜੀ ਦੀ ਯਾਦ ਨੂੰ ਸਮਰਪਿਤ ਹੈਪੀ ਕਲੱਬ ਦੇ ਸਹਿਯੋਗ ਨਾਲ ਅੱਗਰਵਾਲ ਧਰਮਸ਼ਾਲਾ ਤਪਾ ਵਿਖੇ 27 ਅਗਸਤ ਨੂੰ ਲੱਗਣ ਵਾਲੇ ਕੈਂਪ ਸਬੰਧੀ ਜਾਣਕਾਰੀ ਦਿੰਦਿਆਂ ਪ੍ਰਗਟ ਕੀਤੇ। ਉਨਾਂ ਅੱਗੇ ਕਿਹਾ ਕਿ ਖੂਨਦਾਨ ਸਾਨੂੰੂ ਇਹ ਵੀ ਸਿੱਖਿਆਂ ਦਿੰਦਾ ਹੈ ਕਿ ਅੱਜ ਤੱਕ ਖੂਨ ਲੈਣ ਵਾਲੇ ਕਿਸੇ ਵੀ ਵਿਆਕਤੀ ਨੇ ਲੋੜ ਵੇਲੇ ਆਪਣੇ ਲੱਗਣ ਵਾਲੇ ਖੂਨ ਨੂੰ ਦਾਨ ਦੇਣ ਵਾਲੇ ਦਾਨੀ ਦੀ ਜਾਤ ਪਾਤ, ਧਰਮ ਬਾਰੇ ਨਹੀ ਪੁੱਛਿਆ, ਜੋ ਉਸ ਦੀ ਜਾਨ ਬਚਾਉਣ ਵਿਚ ਸਹਾਇ ਸਿੱਧ ਹੋਇਆ ਹੈ। ਉਨਾਂ ਕਿਹਾ ਕਿ ਮਨੁੱਖ ਵੱਲੋ ਦਿੱਤੇ ਖੂਨ ਦਾਨ ਨਾਲ ਇਕਲੇ ਕਿਸੇ ਇਕ ਵਿਆਕਤੀ ਦੀ ਕੀਮਤੀ ਜਾਨ ਹੀ ਨਹੀ ਬਚਾਈ ਜਾਂਦੀ ਬਲਕਿ ਉਸ ਨਾਲ ਜੁੜੇ ਅਨੇਕਾਂ ਲੋਕਾਂ ਅਤੇ ਖਾਸ ਕਰ ਉਸ ਦੇ ਪਰਿਵਾਰ ਨੂੰ ਵੀ ਮਰੀਜ ਵਾਂਗ ਹੀ ਨਵਾਂ ਜੀਵਨ ਪ੍ਰਦਾਨ ਹੁੰਦਾ ਹੈ। ਜਿਸ ਲਈ ਸਾਨੂੰ ਸਭ ਨੂੰ ਖੂਨ ਦਾਨ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਸੰਜੂ ਗੁਪਤਾ ਨੇ ਇਹ ਵੀ ਕਿਹਾ ਕਿ ਪੰਜਾਬ ਅਜਿਹੀ ਸਟੇਟ ਹੈ, ਜਿੱਥੇ ਇਕ-ਇਕ ਮਨੁੱਖ ਨੇ ਸੈਕੜੇ ਵਾਰ ਵੀ ਖੂਨ ਦਾਨ ਕੀਤਾ ਹੈ, ਜੋ ਸਾਡੀ ਲਈ ਮਾਣ ਵਾਲੀ ਗੱਲ ਹੈ।
ਸਟੇਟ ਐਵਾਰਡੀ ਪਵਨ ਕੁਮਾਰ ਬਤਾਰਾ ਨੇ ਕਿਹਾ ਕਿ ਤੰਦਰੁਸਤ ਮਨੁੱਖ ਹਰੇਕ ਤਿੰਨ ਮਹੀਨੇ ਬਾਅਦ ਖੂਨਦਾਨ ਕਰ ਸਕਦਾ ਹੈ ਜਦਕਿ ਇਸ ਲਈ ਹਰੇਕ ਮਨੁੱਖ ਨੂੰ ਆਪਣੀ ਜਿੰਦਗੀ ਵਿਚ ਇਸ ਦਾਨ ਲਈ ਬਿਨਾਂ ਕਿਸੇ ਡਰ ਭੈਅ ਦੇ ਅੱਗੇ ਆਉਣਾ ਚਾਹੀਦਾ ਹੈ। ਉਨਾਂ ਇਹ ਵੀ ਕਿਹਾ ਕਿ ਖੂਨਦਾਨ ਕਰਨ ਵਾਲੇ ਵਿਅਕਤੀ ਦਾ ਕੁਝ ਸਮੇਂ ਅੰਦਰ ਹੀ ਖੂਨ ਪੂਰਾ ਹੋ ਜਾਂਦਾ ਹੈ। ਜਿਸ ਲਈ ਘਬਰਾਉਣ ਦੀ ਨਹੀ ਬਲਕਿ ਨਿੱਡਰ ਹੋ ਕੇ ਇਸ ਦਾਨ ਪ੍ਰਤੀ ਹੋਰਨਾਂ ਨੂੰ ਜਾਗਰੁਕ ਕਰਨ ਦੀ ਲੋੜ ਹੈ।
ਕਿਸ਼ੋਰ ਅਵਸਥਾ ਦੇ ਨੌਜਵਾਨ ਈਸ਼ ਕੁਮਾਰ ਨੇ ਕਿਹਾ ਕਿ ਨੌਜਵਾਨਾਂ ਨੂੰ ਖੂਨਦਾਨ ਵੱਲ ਪ੍ਰੇਰਿਤ ਹੋਣਾ ਚਾਹੀਦਾ ਹੈ ਕਿਉਕਿ ਹੁਣ ਸਮਾਂ ਖੂਨ ਨਾਲੀਆ ਵਿਚ ਵਹਾਉਣ ਦਾ ਨਹੀ ਬਲਕਿ ਨਾੜੀਆਂ ਵਿਚ ਵਹਾਉਣ ਦਾ ਹੈ। ਉਧਰ ਪ੍ਰਬੰਧਕਾਂ ਨੇ ਇਹ ਵੀ ਦੱਸਿਆਂ ਕਿ ਖੂਨਦਾਨ ਕੈਂਪ ਲਈ ਸਮੁੱਚੇ ਪ੍ਰਬੰਧ ਕਰ ਲਏ ਗਏ ਹਨ।