ਸ਼੍ਰੋਮਣੀ ਕਮੇਟੀ ਦੀ ਪ੍ਰਧਾਨਗੀ 'ਚ ਬਾਦਲਾਂ ਨੂੰ ਠਿੱਬੀ ਲਾਉਣ ਲਈ ਅਕਾਲ ਤਖਤ ਸਾਹਿਬ ਦੇ ਸਾਬਕਾ ਜਥੇਦਾਰ ਜਸਬੀਰ ਸਿੰਘ ਰੋਡੇ ਨੇ ਸ਼੍ਰੋਮਣੀ ਕਮੇਟੀ ਮੈਂਬਰ ਮੇਜਰ ਸਿੰਘ ਗਿੱਲ ਨਾਲ ਕੀਤੀ ਬੰਦ ਕਮਰਾ ਮੀਟਿੰਗ
ਰਾਮਪੁਰਾ ਫੂਲ (ਬਠਿੰਡਾ) 24 ਸਤੰਬਰ (ਲੁਭਾਸ ਸਿੰਗਲਾ/ਮਨਮੋਹਨ ਗਰਗ/ਗੁਰਪ੍ਰੀਤ ਸਿੰਘ)--
ਸਿੱਖ ਕੌਮ ਦੀ ਮਿੰਨੀ ਪਾਰਲੀਮੈਂਟ ਵਜੋਂ ਜਾਣੇ ਜਾਂਦੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਅਗਲੇ ਦੋ ਮਹੀਨੇ ਬਾਅਦ ਹੋਣ ਵਾਲੀ ਪ੍ਰਧਾਨਗੀ ਦੀ ਚੋਣ ਲਈ ਸਰਗਰਮੀਆਂ ਤੇਜ਼ ਹੋ ਗਈਆਂ ਵਿਖਾਈ ਦੇ ਰਹੀਆਂ ਹਨ। ਪਿਛਲੇ ਲੰਬੇ ਸਮੇ ਤੋ ਕਮੇਟੀ ਪ੍ਰਬੰਧਾਂ ਤੇ ਕਾਬਜ਼ ਬਾਦਲ ਦਲ ਨੂੰ ਪ੍ਰਧਾਨਗੀ ਤੋਂ ਲਾਂਭੇ ਕਰਨ ਲਈ ਉਸਦੇ ਸਿਆਸੀ ਵਿਰੋਧੀਆਂ ਨੇ ਹੁਣੇ ਤੋਂ ਹੀ ਸ਼੍ਰੋਮਣੀ ਕਮੇਟੀ ਮੈਂਬਰਾਂ ਨਾਲ ਰਾਬਤਾ ਵਿੱਢਣਾ ਸ਼ੁਰੂ ਕਰ ਦਿੱਤਾ ਹੈ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵਿੱਚ ਬਾਦਲ ਦਲ ਤੋਂ ਵੱਖ ਹੋਏ ਧੜੇ ਨੇ ਵੀ ਉਸ ਦੇ ਵਿਰੋਧੀਆਂ ਨਾਲ ਸਿਆਸੀ ਤੌਰ ਤੇ ਹੱਥ ਮਿਲਾ ਕੇ ਇੱਕੋ ਮੰਚ ਤੇ ਇਕੱਠੇ ਹੋ ਕੇ ਇਸ ਵਾਰ ਪ੍ਰਧਾਨਗੀ ਲਈ ਪੰਥਕ ਧਿਰਾਂ ਨੂੰ ਮੌਕਾ ਦੇਣ ਦਾ ਹੋਕਾ ਦਿੱਤਾ ਜਾ ਰਿਹਾ। ਮਿਲੀ ਜਾਣਕਾਰੀ ਅਨੁਸਾਰ ਸ਼੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਸਾਬਕਾ ਜਥੇਦਾਰ ਭਾਈ ਜਸਵੀਰ ਸਿੰਘ ਰੋਡੇ ਨੇ ਰਾਮਪੁਰਾ ਵਿਖੇ ਸ਼੍ਰੋਮਣੀ ਕਮੇਟੀ ਮੈਂਬਰ ਜਥੇਦਾਰ ਮੇਜਰ ਸਿੰਘ ਢਿੱਲੋਂ ਦੇ ਗ੍ਰਹਿ ਵਿਖੇ ਅਚਾਨਕ ਦਸਤਕ ਦੇ ਕੇ ਉਨ੍ਹਾਂ ਨਾਲ ਬੰਦ ਕਮਰਾ ਮੀਟਿੰਗ ਕੀਤੀ, ਭਾਵੇਂ ਇਸ ਮੀਟਿੰਗ ਦੇ ਵੇਰਵੇ ਮੀਡੀਆ ਸਾਹਮਣੇ ਕਿਸੇ ਵੀ ਧਿਰ ਵੱਲੋਂ ਨਸਰ ਨਹੀਂ ਕੀਤੇ ਗਏ ਪਰ ਜੇਕਰ ਸੂਤਰਾਂ ਦੀ ਗੱਲ ਸੱਚ ਮੰਨੀਏ ਤਦ ਉਹਨਾਂ ਪਿਛਲੇ ਸਮੇਂ ਪੰਜਾਬ ਅੰਦਰੋਂ ਹੋਈਆਂ ਬੇਅਦਬੀ ਅਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਗੁੰਮ ਹੋਏ ਸਰੂਪਾਂ ਦੀਆ ਘਟਨਾਵਾਂ ਲਈ ਸੱਤਾਧਾਰੀ ਧਿਰ ਨੂੰ ਜਿੰਮੇਵਾਰ ਠਹਿਰਾਇਆ।ਉਨ੍ਹਾਂ ਸਿੱਖਾਂ ਦੀ ਆਵਾਜ਼ ਬੁਲੰਦ ਕਰਨ ਸਿੱਖੀ ਦੇ ਪ੍ਰਚਾਰ ਅਤੇ ਪ੍ਰਸਾਰ ਲਈ ਇੱਕ ਵਧੀਆ ਪ੍ਰਬੰਧਕ ਕਮੇਟੀ ਚੁਣਣ ਵਿੱਚ ਯੋਗਦਾਨ ਪਾਉਣ ਲਈ ਅਪੀਲ ਕੀਤੀ ਭਾਵੇਂ ਸਾਬਕਾ ਜਥੇਦਾਰ ਰੋਡੇ ਨੇ ਕਿਸੇ ਵੀ ਵਿਸ਼ੇਸ਼ ਉਮੀਦਵਾਰ ਦੇ ਨਾਂ ਦਾ ਜ਼ਿਕਰ ਨਹੀਂ ਕੀਤਾ ਪਰ ਉਨ੍ਹਾਂ ਸ਼੍ਰੋਮਣੀ ਕਮੇਟੀ ਮੈਂਬਰ ਢਿੱਲੋਂ ਨੂੰ ਬਾਦਲ ਦਲ ਦੇ ਉਲਟ ਇਸ ਵਾਰ ਪੰਥਕ ਧਿਰਾਂ ਨਾਲ ਨਾਲ ਖੜ੍ਹਨ ਦੀ ਅਪੀਲ ਕੀਤੀ। ਇਸ ਸੰਬੰਧ ਵਿਚ ਜੱਥੇਦਾਰ ਮੇਜਰ ਸਿੰਘ ਢਿੱਲੋਂ ਨਾਲ ਗੱਲਬਾਤ ਕੀਤੀ ਤਦ ਉਹਨਾਂ ਇਸ ਮੀਟਿੰਗ ਵਿੱਚ ਚੋਣ ਬਾਰੇ ਚਰਚਾ ਹੋਣ ਦੀ ਗੱਲ ਤਾਂ ਜਰੂਰ ਕਬੂਲੀ, ਪਰ ਬਾਕੀ ਸਮਾਂ ਆਉਣ ਤੇ ਦੱਸਣ ਬਾਰੇ ਕਹਿਕੇ ਪੱਲਾ ਝਾੜ ਦਿੱਤਾ।