ਕੇਂਦਰ ਸਰਕਾਰ ਦੀਆ ਨੀਤੀਆ ਖਿਲਾਫ ਰਾਈਸ ਮਿੱਲਰਜ ਐਸੋਸੀਏਸ਼ਨ ਇਕਾਈ ਰਾਮਪੁਰਾ ਫੂਲ ਵੱਲੋ ਬੰਦ ਦੇ ਦਿੱਤੇ ਸਹਿਯੋਗ ਲਈ ਪ੍ਰਧਾਨ ਮਨਵੀਰ ਢਿਲੋ ਨੇ ਮਿੱਲਰਾਂ ਦਾ ਧੰਨਵਾਦ ਕੀਤਾ।
ਰਾਮਪੁਰਾ ਫੂਲ (ਬਠਿੰਡਾ) 21 ਅਕਤੂਬਰ (ਲੁਭਾਸ਼ ਸਿੰਗਲਾ/ਮਨਮੋਹਨ ਗਰਗ/ਗੁਰਪ੍ਰੀਤ ਸਿੰਘ) :- ਪੰਜਾਬ ਰਾਈਸ ਮਿੱਲਰਜ ਐਸੋਸੀਏਸ਼ਨ ਇਕਾਈ ਰਾਮਪੁਰਾ ਫੂਲ ਦੇ ਪ੍ਰਧਾਨ ਮਨਵੀਰ ਸਿੰਘ ਢਿਲੋ ਨੇ ਇਲਾਕੇ ਦੇ ਸਮੂਹ ਮਿੱਲਰਾਂ ਦਾ ਧੰਨਵਾਦ ਕੀਤਾ। ਜਿਨਾਂ ਨੇ ਕੇਂਦਰ ਸਰਕਾਰ ਦੀਆ ਚੋਲ ਉਦਯੋਗ ਦੇ ਉਜਾੜੇ ਵਾਲੀਆ ਨੀਤੀਆ ਦੇ ਖਿਲਾਫ ਬੰਦ ਦੇ ਦਿੱਤੇ ਸੱਦੇ ਵਿਚ ਇਕਜੁਟਤਾ ਵਿਖਾਈ। ਪ੍ਰਧਾਨ ਢਿਲੋ ਨੇ ਅੱਗੇ ਕਿਹਾ ਕਿ ਚੋਲ ਉਦਯੋਗ ਨਾਲ ਜੁੜੀਆ ਵੱਖ ਵੱਖ ਐਸੋਸੀਏਸ਼ਨਾਂ ਨੇ ਇਕਜੁੱਟ ਹੋ ਕੇ ਪੰਜਾਬ ਭਰ ਵਿਚ ਆਰ.ਓ ਅਤੇ ਖਰੀਦ ਕੇਂਦਰਾਂ ਵਿਚਲੇ ਝੋਨੇ ਦੀ ਚੁਕਾਈ ਨੂੰ ਬੰਦ ਕਰਕੇ ਇਕ ਸੁਨੇਹਾ ਦਿੱਤਾ ਹੈ ਕਿ ਚੋਲ ਉਦਯੋਗ ਨਾਲ ਜੁੜੇ ਕਾਰੋਬਾਰੀ ਇਕਜੁੱਟ ਹਨ ਅਤੇ ਕੇਂਦਰ ਸਰਕਾਰ ਦੇ ਹਰ ਉਦਯੋਗ ਮਾਰੂ ਫੈਸਲਿਆਂ ਦਾ ਵਿਰੋਧ ਇਕਜੁੱਟ ਹੋ ਕੇ ਕਰਦੇ ਰਹਿਣਗੇ। ਉਨਾਂ ਪੰਜਾਬ ਸਰਕਾਰ ਵੱਲੋ ਉਦਯੋਗ ਨੂੰ ਦਿੱਤੇ ਭਰੋਸੇ ਦਾ ਵੀ ਧੰਨਵਾਦ ਕੀਤਾ, ਜਿਨਾਂ ਵਿਚ ਉਨਾਂ ਪੰਜਾਬ ਦੇ ਸੈਲਰ ਮਾਲਕਾਂ ਨੂੰ ਪਾਈਆਂ ਗਲਤ ਪਨੈਲਟੀਆਂ ਖਿਲਾਫ ਅਤੇ ਉਨਾਂ ਦੀਆ ਮੰਗਾਂ ਅਤੇ ਲੋੜ ਪੈਣ ’ਤੇ ਆਹਢਾ ਵੀ ਕੇਂਦਰ ਨਾਲ ਲਾਉਣਗੇ। ਪ੍ਰਧਾਨ ਢਿਲੋ ਨੇ ਪੰਜਾਬ ਰਾਈਸ ਮਿੱਲਰਜ ਐਸੋਸੀਏਸ਼ਨ ਦੇ ਆਗੂਆਂ ਦੇ ਹਵਾਲੇ ਨਾਲ ਦੱਸਿਆ ਕਿ ਚੋਲ ਉਦਯੋਗ ਨਾਲ ਜੁੜੇ ਕਾਰੋਬਾਰੀਆਂ ਦੀਆ ਫੋਰਟੀਫਾਇਡ ਚੋਲਾਂ ਦੀ ਮਿਲਾਵਟ ਤੋ ਬਾਅਦ ਕੇਂਦਰ ਸਰਕਾਰ ਦੀ ਨਮੂਨਿਆਂ ਵਾਲੀ ਟੀਮ ਵੱਲੋ ਫੋਰਟੀਫਾਇਡ ਚੋਲਾਂ ਦੇ ਨਮੂਨਿਆਂ ਨੂੰ ਫੇਲ ਕਰ ਦੇਣ ’ਤੇ ਮਿੱਲਰ ਖਿਲਾਫ ਕੀਤੀ ਜਾਂਦੀ ਕਾਰਵਾਈ ਦੇ ਖਿਲਾਫ ਵੀ ਇਹ ਹੜਤਾਲ ਹੋਈ ਸੀ ਜਦਕਿ ਇਸ ਸਬੰਧ ਵਿਚ ਪੰਜਾਬ ਸਰਕਾਰ ਅਤੇ ਖੁਰਾਕ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੇ ਭਰੋਸਾ ਦਿਵਾਇਆ ਹੈ ਕਿ ਐਫ.ਆਰ.ਕੇ ਦੇ ਮੁੱਦੇ ‘ਤੇ ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਕੇਂਦਰੀ ਮੰਤਰੀ ਪਿਊਸ ਗੋਇਲ ਨੂੰ ਇਕ ਪੱਤਰ ਲਿਖ ਕੇ ਇਸ ਮਸਲੇ ਦੇ ਹੱਲ ਦੀ ਮੰਗ ਕੀਤੀ ਜਾਵੇਗੀ ਜਦਕਿ ਸੈਂਪਲ ਲੈਣ ਸਬੰਧੀ ਕੇਂਦਰ ਵੱਲੋਂ ਲਏ ਨਵੇਂ ਫੈਸਲੇ ਦੇ ਹੱਲ ਲਈ ਸੈਲਰ ਮਾਲਿਕਾਂ ਅਤੇ ਪੰਜਾਬ ਸਰਕਾਰ ਦੇ ਮੰਤਰੀਆਂ ਤੇ ਵਿਧਾਇਕਾਂ ਦੀ ਇਕ ਸਾਂਝੀ ਕਮੇਟੀ ਬਣੇਗੀ ਜੋ ਇਸ ਮਸਲੇ ਦਾ ਹੱਲ ਕਰੇਗੀ। ਉਨਾਂ ਇਲਾਕੇ ਦੇ ਸਮੂਹ ਸੈਲਰ ਮਾਲਕਾਂ ਨੂੰ ਹੜਤਾਲ ਖਤਮ ਹੋਣ ’ਤੇ ਆਪੋ ਆਪਣੇ ਸੈਲਰਾਂ ਵਿਚ ਝੋਨੇ ਨੂੰ ਲਵਾਉਣ ਲਈ ਕਿਹਾ ਹੈ। ਜਿਕਰਯੋਗ ਹੈ ਕਿ ਕਈ ਦਿਨਾਂ ਤੋਂ ਚਲ ਰਹੀ ਹੜਤਾਲ ਦੇ ਕਾਰਨ ਮੰਡੀਆਂ ਵਿਚ ਝੋਨੇ ਦੀ ਖਰੀਦ ਦਾ ਕੰਮ ਪ੍ਰਭਾਵਿਤ ਹੋਣ ਦੇ ਨਾਲੋ ਨਾਲ ਅੰਬਾਰ ਲੱਗ ਗਏ ਸਨ ਅਤੇ ਚੁਕਾਈ ਨਾ ਹੋਣ ਕਾਰਨ ਸਮੱਸਿਆ ਨਿੱਤ ਦਿਨ ਵੱਡੀ ਹੁੰਦੀ ਜਾ ਰਹੀ ਸੀ। ਜਿਸ ਕਾਰਨ ਆੜਤੀਆਂ ਅਤੇ ਕਿਸਾਨਾਂ ਨੂੰ ਵੀ ਵੱਡੀਆਂ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਹੁਣ ਪੰਜਾਬ ਸਰਕਾਰ ਨੇ ਮਸਲੇ ਵਿਚ ਦਖਲ ਦਿੰਦਿਆਂ ਕੇਂਦਰ ਸਰਕਾਰ ਤੱਕ ਸੈਲਰ ਮਾਲਕਾਂ ਦੇ ਮਸਲੇ ਪਹੁੰਚਾਉਣ ਅਤੇ ਇਸ ਨੂੰ ਹੱਲ ਕਰਨ ਵਿਚ ਸਹਿਯੋਗ ਦਾ ਭਰੋਸਾ ਦਵਾਇਆ ਹੈ। ਜਿਸ ਤੋ ਬਾਅਦ ਹੀ ਮੰਡੀਆਂ ਵਿਚ ਝੋਨੇ ਦੀ ਖਰੀਦ ਅਤੇ ਚੁਕਾਈ ਦਾ ਕੰਮ ਚਲਿਆ ਹੈ।