ਤਪਾ ਦੀਆ ਦੋ ਖਰੀਦ ਏਜੰਸੀਆਂ ਸਰਕਾਰੀ ਕਣਕ ਦੇ ਗੱਟਿਆਂ ਦਾ ਵਜਣ ਹਲਕਾ ਕਰਨ ’ਚ ਮਸ਼ਰੂਫ ! ਜਾਂਚ
ਤਪਾ ਮੰਡੀ, 7ਡੇਅ ਨਿਊਜ ਸਰਵਿਸ,
ਰਾਮਪੁਰਾ ਦੀ ਇਕ ਖਰੀਦ ਏਜੰਸੀ ਵੱਲੋ ਲੱਖਾਂ ਰੁਪੈ ਦੀ ਕਣਕ ਦੇ ਖੁਰਦ ਬੁਰਦ ਤੋ ਬਾਅਦ ਤਪਾ ਸ਼ਹਿਰ ਦੀਆ ਦੋ ਖਰੀਦ ਏਜੰਸੀਆਂ ਵੀ ਜਾਂਚ ਦੇ ਰਾਡਾਰ ਦੇ ਨੇੜੇ ਪੁੱਜਦੀਆ ਜਾ ਰਹੀਆ ਹਨ। ਜਿਨਾਂ ਵੱਲੋ ਬੀਤੇ ਲੰਬੇਂ ਸਮੇਂ ਤੋ ਸਰਕਾਰੀ ਅਨਾਜ ਦੀ ਖੁਰਦ ਬੁਰਦ ਕਰਨ ਦੇ ਸ਼ੱਕ ਜਗ ਜਾਹਿਰ ਹੋਣ ਕਿਨਾਰੇ ਹਨ। ਮਿਲੀ ਜਾਣਕਾਰੀ ਅਨੁਸਾਰ ਸ਼ਹਿਰ ਅੰਦਰਲੀਆ ਦੋ ਪ੍ਰਮੁੱਖ ਖਰੀਦ ਏਜੰਸੀਆਂ ਦੀ ਕੁਝ ਸਮਾਂ ਪਹਿਲਾ ਅੱਗੜ ਪਿੱਛੜ ਬਾਹਰਲੇ ਸੂਬਿਆਂ ਨੂੰ ਅਨਾਜ ਭੇਜੇ ਜਾਣ ਦੀਆ ਸਪੈਸ਼ਲਾਂ ਲੱਗੀਆ ਸਨ, ਭਾਵੇਂ ਉਕਤ ਸਪੈਸ਼ਲ ਲੱਗਣ ਦਾ ਮੁੱਖ ਕਾਰਨ ਚੌਲ ਮਿੱਲਾਂ ਦੀ ਅਲਾਟਮੈਂਟ ਵਿਚ ਕੁਝ ਦੇਰੀ ਸੀ ਜਦਕਿ ਉਨਾਂ ਵੇਲਿਆਂ ਵਿਚ ਮੀਂਹ ਨੇ ਵੀ ਲਗਾਤਾਰ ਆਪਣਾ ਰੰਗ ਵਿਖਾਇਆ ਹੋਇਆ ਸੀ। ਮੀਂਹਾਂ ਦੇ ਕਾਰਨ ਗੁਦਾਮਾਂ ਅੰਦਰ ਪਈ ਕਣਕ ਦਾ ਹਰ ਵਾਰ ਦੀ ਤਰਾਂ ਵਜਣ ਵਧਣਾ ਵੀ ਸੁਭਾਵਿਕ ਸੀ। ਖਰੀਦ ਏਜੰਸੀਆਂ ਵੱਲੋ ਜਦ ਆਪੋ ਆਪਣੇ ਗੁਦਾਮਾਂ ਵਿਚੋ ਕਣਕ ਦੇ ਭਰੇ ਟਰੱਕਾਂ ਨੂੰ ਮਾਲ ਗੱਡੀ ਦੀਆ ਬੋਘੀਆ ਵਿਚ ਪਾਏ ਜਾਣ ਤੋ ਪਹਿਲਾ ਕਰਵਾਏ ਵਜਣ ਲਈ ਕੰਡੇ ’ਤੇ ਟਰੱਕ ਵਿਚਲੀ ਕਣਕ ਦੇ ਭਾਰ ਵਿਚ ਕਾਫੀ ਵਾਧਾ ਵਿਖਾਈ ਦਿੱਤਾ। ਜਿਸ ਤੋ ਬਾਅਦ ਸਬੰਧਤ ਖਰੀਦ ਏਜੰਸੀਆਂ ਦੇ ਅਧਿਕਾਰੀਆਂ ਦੀਆ ਵਾਛਾਂ ਖਿੜ ਗਈਆ ਕਿਉਕਿ ਸਾਉਣੀ ਦੇ ਸੀਂਜਣ ਤੋ ਪਹਿਲਾ ਹੀ ਵੱਡਾ ਸੀਂਜਣ ਲੱਗਦਾ ਨਜਰ ਆਇਆ, ਵਸ ਫੇਰ ਕੀ ਸੀ, ਕਣਕ ਦੇ ਗੱਟਿਆਂ ਦਾ ਵਧਿਆ ਭਾਰ ਹੋਲਾ ਕਰਨ ਲਈ ਗੁਦਾਮ ਅੰਦਰ ਦਰਜਣਾਂ ਮਜਦੂਰ ਲਗਾ ਦਿੱਤੇ ਗਏ। ਉਧਰ ਇਸ ਦੀ ਭਿਣਕ ਮਿਲਦਿਆਂ ਹੀ ’ ਜਦ ਤਾਏ ਦੀ ਧੀ ਚਲੀ ਤਦ ਮੈਂ ਕਿਉ ਰਹਾ ਇਕੱਲੀ ‘ ਵਾਲੀ ਕਹਾਵਤ ਨੂੰ ਸਹੀ ਸਿੱਧ ਕਰਦਿਆਂ ਦੂਜੀ ਖਰੀਦ ਏਜੰਸੀ ਦੇ ਵੀ ਅਧਿਕਾਰੀਆਂ ਨੇ ਵੀ ਸੂਏ ਸੇਬੇ ਖਰੀਦ ਲਿਆਂਦੇ ਅਤੇ ਵੱਡੀ ਗਿਣਤੀ ਵਿਚ ਮਜਦੂਰਾਂ ਨੂੰ ਨਗ ਬਣਾਉਣ ਦਾ ਕੰਮ ਸੋਪ ਦਿੱਤਾ। ਜਿਨਾਂ ਨੇ ਆਪਣਾ ਕੰਮ ਬਾਖੂਬੀ ਨਾਲ ਨਿਭਾਇਆ ਅਤੇ ਲੱਖਾਂ ਦੀ ਕਣਕ ਦੇ ਨਗ ਬਣਾ ਕੇ ਅਧਿਕਾਰੀਆਂ ਨੂੰ ਆਰਥਿਕ ਪੱਖ ਤੋ ਬਾਦਸ਼ਾਹ ਬਣਾ ਦਿੱਤਾ। ਉਧਰ ਸਰਕਾਰੀ ਗੁਦਾਮ ਵਿਚੋ ਉਕਤ ਕਣਕ ਇਕ ਚੋਲ ਮਿੱਲ ਮਾਲਿਕ ਰਾਹੀ ਲੁਧਿਆਣਾ ਦੀਆ ਫਿਲੋਰ ਮਿੱਲਾਂ ਦੇ ਰਾਹ ਪੈ ਗਈ। ਜਿਸ ਨੇ ਉੱਚੇ ਭਾਅ ਵਿਚ ਵਿਕ ਕੇ ਗਰੀਬਾਂ ਦਾ ਢਿੱਡ ਭਰਿਆ ਅਤੇ ਇਧਰ ਅਧਿਕਾਰੀਆਂ ਅਤੇ ਬਾਬੂਆਂ ਨੇ ਵੀ ਸਰਕਾਰੀ ਕਣਕ ਨਾਲ ਖੂਬ ਰੰਗ ਚੋਖਾ ਕੀਤਾ। ਉਧਰ ਹੁਣ ਇਸ ਮਾਮਲੇ ਦੀ ਜਾਂਚ ਆਉਦੇਂ ਦਿਨਾਂ ਵਿਚ ਤੇਜੀ ਫੜਣ ਜਾ ਰਹੀ ਹੈ। ਜਿਕਯੋਗ ਇਹ ਵੀ ਹੈ ਕਿ ਨੇੜਲੇ ਪਿੰਡ ਅੰਦਰ ਬਣੇ ਇਕ ਗੁਦਾਮ ਵਿਚਲੀ ਕਣਕ ’ਤੇ ਵੀ ਪਾਣੀ ਦੇ ਕੀਤੇ ਛਿੜਕਾਅ ਕਾਰਨ ਉਥੇ ਦੇ ਅਨਾਜ ਦੀ ਢੋਅ ਢੁਆਈ ਆਰਜੀ ਤੌਰ ’ਤੇ ਰੁਕੀ ਹੋਈ ਹੈ। ਹੁਣ ਵੇਖਦੇ ਹੀ ਕਿ ਵਧੀ ਹੋਈ ਕਣਕ ਕੀ ਕੀ ਰੰਗ ਵਿਖਾਏਗੀ।
ਫੋਟੋ - ਸਰਕਾਰੀ ਗੁਦਾਮ ਅੰਦਰ ਕਣਕ ਦੇ ਨਗ ਬਣਾ ਰਹੇ ਮਜਦੂਰ