ਤਪਾ ’ਚ ਵੀ ਐਫ.ਸੀ.ਆਈ ਨੇ ਕਰੋੜਾਂ ਦੇ ਅਨਾਜ ਘੁਟਾਲੇ ਨੂੰ ਜਨਮ ਦਿੱਤਾ!

ਤਪਾ ’ਚ ਵੀ ਐਫ.ਸੀ.ਆਈ ਨੇ ਕਰੋੜਾਂ ਦੇ ਅਨਾਜ ਘੁਟਾਲੇ ਨੂੰ ਜਨਮ ਦਿੱਤਾ!
7ਡੇਅ ਨਿੳੂਜ ਸਰਵਿਸ
ਜਿਲਾ ਬਰਨਾਲਾ ਦੇ ਸ਼ਹਿਰ ਤਪਾ ਮੰਡੀ ਦੀ ਐਫ.ਸੀ.ਆਈ ਦਫਤਰ ਦੀ ਦੇਖ ਰੇਖ ਹੇਠ ਪਿੰਡ ਧੋਲਾ ਵਿਚਲੇ ਇਕ ਨਿੱਜੀ ਕੰਪਨੀ ਦੇ ਗੁਦਾਮ ਅੰਦਰੋ ਪਿਛਲੇ ਕੁਝ ਮਹੀਨਿਆਂ ਵਿਚ ਹੀ ਕਣਕ ਨੂੰ ਇਧਰ ਉਧਰ ਕਰਨ ਦੇ ਮਾਮਲੇ ਵਿਚ ਕਰੋੜਾਂ ਰੁਪੈ ਦੇ ਅਨਾਜ ਦੇ ਖੁਰਦ ਬੁਰਦ ਅਤੇ ਇਸ ਤੋ ਵੀ ਜਿਆਦਾ ਸਰਕਾਰੀ ਅਨਾਜ ਨੂੰ ਸਰਕਾਰੀ ਮਾਪਦੰਡਾਂ ਦੀ ਅਣਦੇਖੀ ਕਰਕੇ ਹੋਰਨਾਂ ਰਾਜਾਂ ਨੂੰ ਭੇਜੇ ਜਾਣ ਦੀਆ ਚਰਚਾਵਾਂ ਜੋਰਾਂ ’ਤੇ ਹਨ, ਭਾਵੇਂ ਇਸ ਸਬੰਧੀ ਉੱਚ ਅਧਿਕਾਰੀਆਂ ਤੱਕ ਇਹ ਗੱਲ ਉਪੜੀ ਹੈ ਜਾਂ ਨਹੀ ਇਸ ਸਬੰਧੀ ਪਹੇਲੀ ਬਣੀ ਹੋਈ ਹੈ। ਸੂਤਰਾਂ ਦੀ ਮੰਨੀਏ ਤਾਂ ਲੰਘੇ ਕੁਝ ਮਹੀਨੇ ਤੋ ਬਾਅਦ ਇਥੋ ਦਰਜਣ ਭਰ ਸਪੈਸ਼ਲਾਂ ਰਾਹੀ ਕਣਕ ਬਾਹਰਲੇ ਸੂਬਿਆਂ ਨੂੰ ਭੇਜੀ ਗਈ ਹੈ ਤਾਂ ਜੋ ਸਰਕਾਰ ਦੀ ਸਸਤੀ ਜਾਂ ਮੁਫਤ ਦਰ ’ਤੇ ਲੋਕਾਂ ਨੂੰ ਵੱਖ ਵੱਖ ਸਕੀਮਾਂ ਰਾਹੀ ਵੰਡ ਜਾਣ ਵਾਲੇ ਅਨਾਜ ਦੀ ਸਕੀਮ ਨੂੰ ਨੇਪਰੇ ਚਾੜਿਆ ਜਾ ਸਕੇ। ਤਪਾ ਇਲਾਕੇ ਅੰਦਰਲੀਆਂ ਅੱਧੀ ਦਰਜਣ ਸਰਕਾਰੀ ਖਰੀਦ ਏਜੰਸੀਆਂ ਕੋਲ ਇਲਾਕੇ ਅੰਦਰ ਜਿਆਦਾਤਰ ਓਪਨ ਗੁਦਾਮ ਹੀ ਉਪਲਬਧ ਹਨ ਜਦਕਿ ਇਥੇ ਕਣਕ ਦੀ ਸਟੋਰੇਜ ਲਈ ਛੱਤ ਪਾਏ ਵਾਲੇ (ਇੰਨਡੋਰ) ਗੁਦਾਮਾਂ ਉਪਲਬਧ ਹਨ, ਤਾਂ ਜੋ ਕਣਕ ਨੂੰ ਸੁਰੱਖਿਅਤ ਰੱਖਿਆ ਜਾ ਸਕੇ। ਇਸ ਗੁਦਾਮ ਅੰਦਰ 9 ਲੱਖ ਦੇ ਕਰੀਬ ਕਣਕ ਦੇ ਗੱਟੇ ਦੇ ਸਟੋਰ ਹੋਣ ਬਾਰੇ ਪਤਾ ਲੱਗਿਆ ਹੈ। ਅਪ੍ਰੈਲ/ਮਈ ਮਹੀਨੇ ਵਿਚ ਸਟੋਰ ਕੀਤੀ ਕਣਕ ਦਾ ਵਜਣ ਬਰਸਾਤੀ ਮੌਸਮ ਤੱਕ ਵੈਸੇ ਹੀ ਵਧ ਜਾਂਦਾ ਹੈ, ਕੇਂਦਰ ਸਰਕਾਰ ਵੱਲੋ ਕਰੋੜਾਂ ਲੋਕਾਂ ਨੂੰ ਮੁਫਤ ਅਨਾਜ ਦੇਣ ਦੀ ਸਕੀਮ ਤਹਿਤ ਪੰਜਾਬ ਅੰਦਰੋ ਕਣਕ ਨੂੰ ਹੋਰਨਾਂ ਰਾਜਾਂ ਨੂੰ ਭੇਜੇ ਜਾਣ ਦੀ ਤਜਵੀਜ ਦੇ ਤਹਿਤ ਤਪਾ ਅੰਦਰੋ ਵੀ ਕਣਕ ਰੇਲਵੇ ਵਿਭਾਗ ਦੀਆ ਮਾਲ ਗੱਡੀਆ ਰਾਹੀ ਹੋਰਨਾਂ ਰਾਜਾਂ ਨੂੰ ਭੇਜੀ ਗਈ ਹੈ, ਪਰ ਇਥੇ ਵਿਭਾਗ ਦੇ ਕੁਝ ਜੁੰਮੇਵਾਰਾਂ ਨੇ ਸਪੈਸ਼ਲ ਲੱਗਣ ਤੋ ਇਕ ਦਿਨ ਪਹਿਲਾ ਹੀ ਉਕਤ ਗੁਦਾਮ ਅੰਦਰ ਭੇਜੀ ਜਾਣ ਵਾਲੀ ਕਣਕ ਦੇ ਚੱਕਿਆਂ ਨੂੰ ਕਥਿਤ ਤੌਰ ’ਤੇ ਪਾਣੀ ਰਾਹੀ ਗਿੱਲਾ ਕਰਕੇ ਉਸ ਦੇ ਵਜਣ ਵਿਚ ਚੋਖਾ ਵਾਧਾ ਕਰ ਦਿੱਤਾ ਲਿਆ ਜਾਂਦਾ ਸੀ ਜਦਕਿ ਅਜਿਹੀ ਗਿੱਲੀ-ਅੱਧਗਿੱਲੀ ਕਣਕ ਨੂੰ ਮਾਲ ਗੱਡੀ ਰਾਹੀ ਹੋਰਨਾਂ ਰਾਜਾਂ ਨੂੰ ਭੇਜ ਦਿੱਤਾ ਜਾਂਦਾ ਰਿਹਾ ਹੈ। ਇਹ ਵਰਤਾਰਾ ਪਿਛਲੇ ਕਾਫੀ ਸਮੇਂ ਤੋ ਲਗਾਤਾਰ ਚਲ ਰਿਹਾ ਹੈ, ਭਾਵੇਂ ਇਹ ਸਰਕਾਰੀ ਕਣਕ ਵੱਖ ਵੱਖ ਖਰੀਦ ਏਜੰਸੀਆਂ ਦੀ ਹੈ, ਪਰ ਇਸ ਦੀ ਪਹਿਰੇਦਾਰੀ ਐਫ.ਸੀ.ਆਈ ਵਿਭਾਗ ਕੋਲ ਹੈ। ਇਕ ਪ੍ਰਤੱਖ ਦਰਸ਼ੀ ਨੇ ਦੱਸਿਆਂ ਕਿ ਸਬੰਧਤ ਲੋਕਾਂ ਨੂੰ ਅਜਿਹਾ ਕਰਨ ਤੋ ਰੋਕਿਆ ਵੀ ਗਿਆ ਸੀ ਕਿਉਕਿ ਵਧੇ ਵਜਣ ਵਾਲੀ ਕਣਕ ਦੇ ਖੁਰਦ ਬੁਰਦ ਕਰਨ ਦੇ ਨਾਲ ਭੇਜੀ ਜਾਣ ਵਾਲੀ ਕਣਕ ਦੀ ਗੁਣਵਤਾ ’ਤੇ ਵੀ ਮਾੜੇ ਪ੍ਰਭਾਵ ਬਾਰੇ ਜਾਣੂੰ ਕਰਵਾਇਆ ਗਿਆ ਸੀ ਕਿਉਕਿ ਅਧਗਿੱਲੀ ਕਣਕ ਦੇ ਪਹੁੰਚਣ ਵਿਚ ਕੁਝ ਦਿਨ ਲੱਗਣ ਤੋ ਬਾਅਦ ਉਸ ਵਿਚੋ ਇਕ ਵੱਖਰੇ ਤਰ੍ਹਾਂ ਦੀ ਬਦਬੂ ਆਉਣ ਲੱਗ ਜਾਂਦੀ ਹੈ, ਜੋ ਖਾਣ ਵਾਲੇ ਮਨੁੱਖੀ ਸ਼ਰੀਰ ਲਈ ਘਾਤਿਕ ਹੁੰਦੀ ਹੈ, ਪਰ ਜੇਬ ਦੇ ਲਾਲਚ ਨੇ ਸਭ ਕੁਝ ਇੰਝ ਹੀ ਚੱਲਣ ਦੇ ਆਦੇਸ਼ ਜਾਰੀ ਰੱਖੇ। ਜੇਕਰ ਵਾਕਇ ਹੀ ਇਹ ਸੱਚ ਹੈ ਤਦ ਇਸ ਦੀ ਉੱਚ ਪੱਧਰੀ ਜਾਂਚ ਹੋਣੀ ਚਾਹੀਦੀ ਹੈ ਤਾਂ ਜੋ ਉਕਤ ਘੁਟਾਲੇ ਨੂੰ ਬੇਪਰਦ ਕੀਤੇ ਜਾਣ ਦੇ ਨਾਲੋ ਨਾਲ ਸਬੰਧਤ ਜੁੰਮੇਵਾਰ ਅਧਿਕਾਰੀਆਂ-ਕਰਮਚਾਰੀਆਂ ਖਿਲਾਫ ਬਣਦੀ ਕਾਨੂੰਨੀ ਕਾਰਵਾਈ ਨੂੰ ਅੰਜਾਮ ਦਿੱਤਾ ਜਾ ਸਕੇ। ਮਾਮਲੇ ਸਬੰਧੀ ਵਿਭਾਗ ਦੇ ਉੱਚ ਅਧਿਕਾਰੀ ਨਾਲ ਗੱਲ ਕੀਤੀ ਤਦ ਉਨ੍ਹਾਂ ਕਿਹਾ ਕਿ ਜਲਦ ਹੀ ਗੁਦਾਮ ਅੰਦਰੋ ਨਮੂਨੇ ਭਰਵਾਏ ਜਾਣਗੇ ਅਤੇ ਵੱਖੋ ਵੱਖ ਰਾਜਾਂ ਨੂੰ ਭੇਜੀ ਕਣਕ ਦੀ ਡਿਟੇਲ ਮੰਗਵਾ ਕੇ ਉਥੇ ਵੀ ਟੀਮਾਂ ਭੇਜ ਕੇ ਨਮੂਨੇ ਮੰਗਵਾਏ ਜਾਣਗੇ  ਅਤੇ ਕਿਸੇ ਵੀ ਇਸ ਮਾਮਲੇ ਨੂੰ ਅੰਜਾਮ ਦੇਣ ਵਾਲੇ ਜੁੰਮੇਵਾਰ ਨੂੰ ਬਖਸ਼ਿਆ ਨਹੀ ਜਾਵੇਗਾ। --- ਚਲਦਾ